 |
 |
Maapara kobo a matle, bana ba Thesele.
Ke hoa madume ke re lesedi bana ba Thesele. Kgotso ha e ate ho ditloholo le ditloholwana tsa Rantsho.Ruri ke motlotlo hore e ba ke boela ke fumana monyetla ona wa ho ngola mme ke ntshe maikutlo le bokgoni ba ka ho lona bana beso. E se e batla e le nako a telele jwale ke qetetse ho ngola, haholo ka Sesotho. Ho utlwisa bohloko ha ka kaang hore e bang tjhaba tse ngata di tswelelletse pele ka bophelo mme tsa putswa ka katleho, ha ngwana Mosotho yena a ntse a hafa ka nkatana. Ke batlile mme ka batlisisa dingolwa tsa Sesotho, empa ka iphumana ke itshwere seledu ke ahlamisitse molomo ke tshwabo ha ke elellwa hore ke sehlotshwana se senyenyane jwang sa Basotho ba thahasellang puo le dingolwa tsa Sesotho. Ke bakeng lena puo ya Sesotho e kang e tla sirela mme e re lahlehele sa ruri.
Ke swabile nko ho feta molomo ha ke fumana hore Basotho ba kgothalla ho ngola ka Senyesemane ho feeta ho ngola ka Sesotho!Ke mpa ke etsa thapedi, kodi ya malla, ho Basotho hore re eme ka maoto e se re mohlomong ra iphumana re phirimelletswe. Dithuto tsa mahlale di ntshetsa tjhaba tse ding pele, mme le rona re loketse ke ho ihlwa setha re sebelletse polokeho le ntshetso pele ya Sesotho. Boholo ba batjha ha ba tsebe ke re le ho bua Sesotho sena se paala!
Empa ke thabile hore Basotho ba bangata ha kaana ba sa ntsane ba na le thahasello ya ho ithuta le hona ho ntshetsa Sesotho pele. Ke bile ke kgothwatswa ke ho bona puo tsa Rantsho di rutwa mafatsheng a mose, le ha kwana mona lapeng re tshwere bothata.Ena empa e le kgato ya ho qala feela. Ke kgatha tema ha ke etsa tjena, mme ho ho rona Basotho hore re nka nalane ya rona e le bohlokwa ha kae ho rona.
Kere pele e ya pele ngwana Rantsho. Tloholo sa Napo le Mosito. Kgoho e matha ka lerapo thabeng mme ditjhaba di eme matlotlosiyane.Ka o lotha, "Ka majwe mabedi mabetsa hole!
1998 - 2007 Afrikan Virtual Resource and Nalane.
All rights reserved.